上個禮拜講到杜拜嘅「熱」，今次呢我想講講佢嘅雨天同沙塵暴，呢兩樣真係無乜朋友問，但其實好值得去講！

    首先，本人係十分討厭雨天，所以嚟到杜拜呢幾年，我好開心，因為呢喥好少落雨。原來成個阿聯酋年均降雨量少於100mm，而自然降雨大多數集中喺“冬季”，尤其係3、4月。為咗應付乾旱缺水嘅現象，根據網上資料，阿聯酋2020上半年已經執行咗超過200次嘅人工降雨任務（呢喥講緊係成個國家，唔單止杜拜）。因為政府積極推動人造雨，年降雨量增加超過30%。有趣的是，每次落完雨，無論大雨細雨，都水浸咁款，到處都係坑坑窪窪嘅水氹。條條路都大塞車，唔講以為落咗成日黑雨（其實不過係香港嘅短暫黃雨，甚至係小雨而已）。但點解落少少就搞到周街水浸？我發現，原來條街係無去水渠㗎！！！人工降雨都係十年前先開始嘅事，睇嚟當初啲城市規劃師喺建造呢個沙漠城市時真係完全無考慮過雨水排放呢個問題。所以，每次一落雨，成條街都一片狼藉。舊年仲好笑，有次落雨落到連Dubai mall都變成水塘。好在，佢呢啲雨其實每次發生都係頗短暫，而且係局部地區降雨。唔似香港咁，一個雨季可以落成個禮拜嘅雨，落到個人心都灰埋。

    除咗落雨，沙漠地區當然少不免要提及下沙塵暴啦！大家聽到呢三個字，又唔使太怕，唔係北京嗰種沙塵滾滾，不見天日，漫天黃沙，出街要帶呼吸器嘅景象。我嚟咗咁多年，都係親身經歷咗一次比較嚴重嘅沙塵暴，不過都只係持續咗半個鐘而已。第一次見證沙塵暴，感覺都幾奇妙。當時我喺屋企，明明五分鐘前好地地，忽然望出去，發現對面街嘅建築物幾乎消失於沙塵中，半個鐘之後，一切又恢復正常，好似發咗場夢咁。杜拜一年大部分時間都係好好天嘅，夏天就比較常有霧，因為氣溫高，濕度高，夜晚潮濕，日間霧氣不能完全散去。

    另外仲有樣嘢真係唔講唔知，寫文做資料搜集時發現，發現其實阿聯酋都會落雪㗎！！ 距離杜拜市區大約一小時以外嘅另一個酋長國Ras Al Khaimah今年年初就落咗場大雪，積雪仲有成10cms厚添啊！雪呢，就真係唔係成日見到，杜拜亦都未曾落過，嚟到杜拜真係想睇雪嘅都可以去Mall of the Emirates個室內滑雪場睇下。我就未試過啦，記得當初滿心期待想去體驗下，結果止步於門前，因為望落去流流地咁。下次如果經過，再影相俾大家睇睇。

    題外話一則：喺香港，講到滑雪，好多人都會諗起日本。而中東居住嘅我哋，近近地，原來都可以飛去黎巴嫩、摩洛哥，伊朗同埋土耳其滑雪。記得好耐之前，我班機有個客同我講，佢去伊朗滑雪。我當時聽完眼都突埋，下？乜伊朗都會落雪？（真係講出嚟都失禮，我中學時其實其讀地理㗎～好在我地理老師無我FB。）聽完我都想去伊朗滑雪體驗下，聽落都型棍啊！