上文提到在台灣聘請外傭係要蓄點數，由於困難從從，台灣家庭會考慮另一種幫手 – 台灣本地保母。

台灣保母有考牌制度。合法的保母需要到政府機關『考牌』，政府認證後，便可領有「居家式托育服務登記證」( 非保母技術證 )，並需向各區居服中心完成登記。具有以上證書，方可成爲台灣合法執業托育人員。

台灣保母可分為以下幾種托育方式：

1. 「在宅保母」，即係將小朋友送到保母家照顧。好處係價錢「相對」便宜，日托（16小時）行情價約2萬5到3萬臺幣不等，但保母同一時間可以最多照顧4名小朋友（其中未滿2歲者最多2人，其餘任何年齡均可）

2. 「到府/到宅保母」, 即係保母上門服務。好處係可以一對一照顧小朋友，但費用昂貴，8小時行情價約4-5萬臺幣。

3. 「臨托保母」，即係臨時幫忙照顧，價錢以不同托育方式有所差異，方便要臨時出差或者加班的父母；而臨托保母都十分受歡迎，無論在職或是全職媽媽真係好需要休息時間，給自己一個Me Time.

無論係用哪個方式移居台灣，有小朋友家庭真係要好好計劃一下支援照顧小朋友這個環節。父母當然會親力親爲照顧，但工作上的總總安排，甚或有時候需要換下手休息下，選擇保母無可厚非。

另外筆者想提提大家，台灣保母收費還有個行規，就係需要付年終獎金及三節禮金（即係農曆過年、端午節、中秋節的獎金）。筆者當初都嚇了一跳，以台灣的人均收入，聘請一個保母的開支分分鐘占了家庭收入的一半；但台灣保母市場好搶手，加上他們有托育人數限制，一個好的保母分分鐘需要等他一年半載。

以爲係香港養小朋友唔容易？ 係台灣仲難啊!