由細到大，我算係一個十分堅強獨立嘅女仔，除咗間中會唔爭氣咁為咗啲男女私情而流淚，平時真係好少喊。就算隻身一人嚟陌生嘅穆斯林國家，離開香港前我都無流過一滴淚。居住咗喺一個高速高質嘅地方(香港)咁耐，嚟到呢個國家(硬件一百分，軟件六十分)嘅地方，真係成日俾人激到七孔生煙。而當中最常聽到人投訴嘅一樣就係本地嘅的士服務。

喺呢個繁華嘅中東城市，巴士及鐵路發展不及香港。所以好多時候，的士係重要嘅代步工具。司機全部都係印巴籍，英文水平低，對道路亦唔熟悉。如果你要去某個地方，最好就係show個Google map，避免司機繞路多收錢之餘，又可以根據實時路面情況選擇較快嘅路線去到目的地。記得初來報到時，我仲未開通上網計畫，有日要下晝一點去到美國領事館申請工作簽證。我早早就出門了，上到的士就同司機講我要去美國領事館，已經問咗佢識唔識路。大概20分鐘之後，終於到達「目的地」。落車一睇，佢車咗我去菲律賓領事館。咁我唯有叫佢開Google map 跟住地圖去啦。 途中佢都有問我，係咪喺呢邊啊?呢條路啊？… 人生路不熟，我又聽唔明佢啲口音。只好同佢講，你跟住GPS行就得啦。結果去到第二個「目的地」，問一問大廈保安，佢話我搵錯地方“呢喥好多年前就係領事館，而家已經搬遷去咗另一邊。”我嬲到要落車，既然你唔識路，我換一架的士都理所當然！兜咗差唔多成個鐘錯路，200蚊港幣嘅的士錢，我真係俾唔落。 呢個時候已經就快1點了，我連自己距離美國領事館有幾遠都唔知，果刻心情真係尤如熱鍋上嘅螞蟻。唔俾錢，司機當然唔肯俾我走。我就話咁一齊搵差人理論啦！咁啱見到路邊泊咗架警車，我就走埋去。點知啲差人話唔識英文，叫我搵附近棟大廈嘅保安。保安話我知，最就近嘅差館步行去都要成30分鐘。個司機就叫我上返車，我哋一齊開過去。我當然唔會信佢，堅持唔會再上呢架賊車。睇睇個手錶，我只想快啲去到領事館，連試用期都未過嘅我真係唔想因為申請簽證遲到而被踢返香港。於是，我快步走出大馬路，試圖擺脫呢個魔鬼司機。魔鬼司機上返架賊車尾隨我，又話自己死老豆啊乜乜乜咁，好需要呢程的士錢。我呢個時候已經臨近崩潰了，擔心工作不保之餘又覺得佢無比煩，點撇都撇唔甩。最後為求擺脫佢，扔咗一半的士錢俾佢，而個魔鬼司機終於肯離我而去了。

呢個時候新問題又嚟啦，喺路邊等咗好一陣都唔見任何的士，心急如焚嘅我慢慢沿住高速公路行，路邊車輛呼嘯而馳，頂著午時嘅烈日，四十幾度高溫，行咗唔到5分鐘已經汗流浹背了。無助萬分嘅我喺高溫酷曬下最後都係忍唔住流咗人在異鄉嘅第一滴眼淚。呢種徬徨無助感，聽就聽得多，今次終於親自體會到。

最後，我成功截到㗎的士去到領事館，雖然遲咗大半個鐘，但由於申請人數眾多，我並沒有被拒諸門外，只是站在隊尾罷了。

這就是我異鄉第一滴眼淚嘅由來，其餘被激親嘅經歷都只係令我破口大罵而已。有機會再分享俾大家聽。