自從嚟咗杜拜，朋友都會問我好多問題，“杜拜有無酒飲？”呢個絕對係其一！！ 我嘅答案係：豬，有得你食；酒，當然有得你飲！  如果你以為杜拜無酒飲，少年你太年輕了！酒，多多都有得你飲，只怕你唔飲得咋！

  同豬肉一樣，首先我哋講下點解穆斯林不能飲酒。喺《古蘭經》教條下，酒是Haram，即是被真主禁止的。皆因酒能亂性，過度飲酒對身體有害，破壞社會安定。喺一啲嚴守教條嘅穆斯林國家，例如沙地阿拉伯、科威特，伊朗等，政府係全面禁酒，連旅客入境都係”酒精不得內進“。相反，杜拜喺咁多個中東國家中相對開放（無人咁多石油，要促進旅遊同經濟啊），酒，你可以飲，只要遵守一啲規例就可以了。

   基本杜拜嘅上所有夜場、酒店同部分餐廳都會提供酒精飲品，消費時，亦無需出示任何證明（當然你要滿21歲啦）註解1。所以無論係旅客定我呢啲外來居民，想要飲返兩杯都係完全無問題嘅。只係日常去超級市場或者便利店，你就唔會買到酒精飲品。如果杜拜居民想要買酒喺屋企飲嘅話，就要出示酒牌（liquor licence，大概570HKD），到專門賣酒嘅Liquor store購買酒精飲品。仲有一個更加方便嘅方法，就係網上訂購。買滿250AED（約527HKD）仲有免費送貨添！貴唔貴？我會話價錢合理啦！總比自己出去食飯飲返杯便宜得多！舉個例子，兩打Heineken 250ml，盛惠143.3AED（平均12.6HKD一罐）。紅酒一支最平30AED，最貴37xAED你都搵到。就咁睇落，杜拜買酒分分鐘平過香港。除此之外，身邊亦都會有朋友唔介意揸一個鐘頭車去隔離酋長國買酒（買酒時無需出示酒牌）。另外如果入境杜拜，你可以喺杜拜機場嘅免稅商店買酒，本人未試過，但有個愛酒嘅朋友就好鍾意喺免稅店買，據說有靚酒，價錢好，仲可以送埋貨。大家有機會可以去望下。

     另外有樣嘢都值得一提，就係杜拜嘅Brunch文化。先講明，呢個當然唔係本地嘅傳統，而係多得果九成expats同埋遊客所賜。每逢假日，好多餐廳同埋酒店都會推出Brunch優惠套餐，一般無酒精套餐五百零蚊港紙，House beverages無限飲就一千蚊港紙鬆啲，豪少少飲埋香檳就加多二、三百。包你飲到黃膽水都嘔埋出嚟！ 話說我第一次去Brunch係出席朋友嘅生日派對，大概晏晝12點零開始，飲到3、4點Brunch結束，大家移師去餐廳後嘅club（其實間餐廳喺一間酒店入面，杜拜好多酒店有埋夜場）。大姐我入到去大開眼界，黑媽媽，音樂大開，人頭湧湧，唔講真係唔知當時只係下晝4點。雖則我喺香港也曾有些瘋狂歲月，但係天光光去夜場，我真係未試過。發夢都估唔到，我居然喺杜拜做到。無記錯，我玩到5點就折埋返屋企。當然，如果你身子好，精力好嘅，Brunch完直落去埋Happy Hour飲多杯，食埋個晚飯儲下體力，夜晚再蒲過，機會一定有（呢喥夜場凌晨3點打烊）。就咁睇，喺杜拜，只要你荷包夠滿，精力夠好，由12pm飲到3am是完全無問題的！

   睇到呢喥，大家係咪好驚訝，原來杜拜係咁開放嘅呢！連我自己都大開眼界～ 杜拜有好多British pubs，飲親嘢都見到一扎“Babes”（英國女仔好鍾意叫人Babe,所以我講Babe嘅時候就係講緊佢哋），唔講以為自己去咗英國。

   最後提醒大家，7個酋長國入面餐廳/酒吧都有提供酒精飲品，除咗Sharjah。如果日後嚟阿聯酋行程涉及另一酋長國，建議大家都係上網check一check最updated嘅資訊。另外飲還飲，千祈唔好醉酒駕駛同埋喺非指定場所喥飲（當街飲酒係犯法㗎！）。

註解1  事實上，杜拜居民無論係購買/攜帶/飲用/存放都需要申請酒牌。即使係旅客，到餐廳/酒吧都需出示旅客酒牌。文章中提及嘅係我嘅個人及身邊朋友經歷。居住4年有多，從未被要求出示酒牌，亦未聽過身邊朋友有被查嘅經歷。要知道，旅遊業對呢個國家經濟體系甚為重要。飲還飲，唔好搞出個大頭佛，平時真係無人得閒理你有無酒牌。

有關旅客酒牌資料來源：https://www.khaleejtimes.com/nation/dubai/dubai-to-offer-free-30-day-alcohol-license-for-tourists-