上一篇文章提到杜拜係咪有種族歧視呢個問題，仲有樣嘢大家都成日問我，就係有關性別呢方面嘅歧視，姐係「女人喺杜拜係咪好無地位？」呢類問題時常出現。住咗咁多年，我又真係無覺得因為自己嘅性別而受到一啲不公平嘅待遇。 今日我哋就嚟淺談女性喺杜拜生活嘅待遇。(所謂淺談，就是以一個外國人在杜拜居住嘅日常觀察和體驗而論。要深入討論，尤其係法律上男女嘅待遇，暫不是本文方向。)

首先，我發現好多人都成日都將「沙烏地阿拉伯」(Saudi Arabia)同「阿拉伯聯合大公國」(United Arab Emirates)兩者混淆。三年前，沙烏地阿拉伯才允許女性開車，到目前為止，女性喺沙烏地阿拉伯生活仍然受到好多限制。或者因為兩國地理位置相鄰，而且同是信奉伊斯蘭教，大家才常常將兩者混淆。

沙烏地阿拉伯我未去過，充其量只係做過幾班即日來回機。印象中，最深刻都係要常常處理乘客座位問題。因為好多只露出眼睛嘅女人唔願意同陌生男人坐埋一齊。 一般買機票時，地勤會儘量避免呢個情況發生，當然，座位及乘客眾多，未能滿足每一個人都好正常，所以上咗機之後有時都需要我哋幫忙。(大多數乘客都識做，會自己調位。)

講返正題，啲朋友成日問我「女人可唔可以揸車？」「女人係咪會成日遭到不公平對待？」此類問題。嗱！有睇開我啲文嘅讀者，心裡大概知個一二。例如，一個家庭如有多過一個妻子，當中有人認為自己受到不公平對待(金錢或情感上)，佢係可以將丈夫告上法庭，保障自己權益受到公平對待。平日在公共交通工具上，亦有女性專用車廂(嚟旅行記得睇住搭啊！行錯車廂俾人捉到會罰錢㗎！)。有啲海灘同公園甚至乎每星期有幾日只開放俾女性入場使用。吃喝玩樂，Ladies Night就當然唔少得啦！ 日子大多數係禮拜二，上網仲可以搵到網頁check曬邊一日邊個場有女士之夜。不單如此，據我所知，阿聯酋本國女性更沒有負擔經濟嘅義務，日常開支都係由家中男性來承擔，小時候係父親，結婚後是丈夫，沒有父親或未婚的則由家中兄弟負責。至於女人可唔可以揸車，這個在杜拜早就不是問題了。

大家下次嚟杜拜嘅時候，可以乘搭女性專用嘅粉紅色的士。通常機場會有條隊專門排此類的士，反而平日在街上就不常見。司機係女性，只要同行中有女性就可以乘搭，價錢同其他的士一樣。

另外提醒大家，職場上若同穆斯林女性工作，肢體接觸上，萬萬要小心。我聽過朋友公司裡有個外國同事，喺工作時沒爲意地拍了拍一位阿聯酋籍嘅女同事膊頭，結果被投訴，之後就被解僱了。喺我哋成日接觸嘅文化中，拍膊頭或者係一個很微不足道嘅小動作，但去到宗教文化相對保守嘅地方，就要多加注意了。