如果有睇開我專頁嘅朋友就會知道，喺疫情嘅早期（三月尾），阿聯酋就實施咗多項嚴格措施去減低肺炎嘅傳播。首項係關閉機場，暫停所有航機服務；再嚟就係封城，同埋實施全面宵禁21日，如非緊急情況都唔可以外出，出街前要上政府網頁申請出入許可，如果被警察抽查發現喺無許可嘅情況下街上遊蕩，係會罰款港幣六千蚊！而家八月份了，肺炎嘅每日新增個案相對於5月高峰期已經有明顯下降（當時每日有800-990新增個案，此時此刻已回落至179啦～！！之前一路喺2xx徘徊），措施已經放鬆咗很多。各大商舖亦恢復經營，餐廳在遵守社交距離下亦可照常營業，感覺上很是歌舞昇平。

   與香港相比的話，我會覺得呢喥啲人普遍嘅病毒防範意識還有待加強。要不是政府強制全民帶口罩的話，我相信好多人都會唔記得肺炎呢樣嘢仍然存在。透過社交媒體，我依然睇到身邊嘅朋友夜夜笙歌，經常聚會派對，生活好不悠閒自在。我同男友基本上都盡量留喺屋企，出街食飯都一定先電話確認前往嘅餐廳有遵守社交距離先會去。（因為男友本身有哮喘，所以都好認真去對待肺炎呢件事）我朋友比較多，所以應酬邀約都多。相信我，好多時候我真係推得就推，因為萬一我惹到返嚟俾男友，佢有咩三長兩短，我真係唔知點賠返個仔俾人。真係要出嘅，當然都係盡量做足防範措施。我發現，出街食飯，好多餐廳每檯都放有一支酒精搓手液；同時，部分餐廳暫停提供實物菜單，取而代之嘅係QR code，掃一掃，就喺自己部電話睇menu。啊！前幾日出席朋友嘅歡送派對先知，原來而家所有嘅夜店都依然係暫停營業，提供酒精服務嘅酒吧都謝絕顧客隨歌起舞，當然，啲人飲大咗兩杯都係照跳啦，呢個就係點解我話呢喥啲人嘅防範意識依然有待加強。日後，若係自己做host揀餐廳食飯嘅話，就一定唔會再嚟呢啲地方（尤其係English pub)㗎啦，佢哋啲社交防範規例形同虛設！

   而家阿聯酋每日依然有過百新增個案，有時候香港嘅朋友同家人發短訊嚟關心我，我都會叫佢哋唔使太擔心。因為，但有樣嘢真係唔講唔知，原來每百萬人口嚟講，阿聯酋做嘅病毒測試（以一個人口近千萬嘅國家嚟講！）數量居於榜首！如果你要在兩個城市之間通勤，就必須持有陰性嘅病毒測試結果證明（證明於48小時內有效）。阿聯酋首都阿布扎比更加進行大規模嘅上門免費病毒測試，航空界別最近也更新條例，所有旅客進入杜拜（即使轉機），都需要持有陰性嘅病毒測試證明（抵達前96小時內有效）。所以我哋睇呢喥每日嘅新增個案過百好似好嚇人咁，但因為大量嘅病毒檢測都真係會令我哋比較放心，呢點香港真係要努力下！不過資訊流通就要學下香港啦。我見香港會公佈確診人士嘅行蹤同住宅位置，但係呢喥就無講得咁詳細，我哋唔會知道邊喥係高危地區，平日都係要靠大家自覺自律唔去人多嘅地方。

   最後，無論睇緊呢篇文嘅你身在何處，我都希望你好好保重，身體健康。但願呢場瘟疫戰快啲結束，我哋大家嘅生活可以儘快恢復正常。

百年難得一見嘅景象啊！ 疫情前，一到表演時間，噴泉周圍同附近啲餐廳一定人山人海，擠滿遊客。
咁啱拍片時，噴泉音樂係阿拉伯文。有時候會放韓文或中文歌，你「行運」嘅時候，仲會聽到BABY SHARK㗎！！！