基本上每個國家都有中國人嘅足跡，有中國人就（好似）自然有中國城（China Town）。杜拜都唔例外，呢喥大約有30萬中國人，喺距離市中心車程20分鐘以外嘅郊區有個華人聚集嘅社區——國際城，雖則個名係國際城，但社區內有真係有好多中國餐廳同商舖，所以我叫佢中國城算！入面仲有一個商品貿易中心，叫做「龍城」（Dragon Mart)，出名平同乜都有。龍城係中國喺世界上最大嘅海外商品貿易中心，同時都係中國喺中東最大嘅商品集散地同銷售批發中心（聽聞喺龍城經商嘅中國人會享有特殊嘅優惠待遇，唔使杜拜擔保人，可以開100%擁有股權嘅獨立公司）。住咗杜拜四年幾，龍城我聽就聽得多，但從來未去過。前幾日想要買個塑膠儲物櫃，於是就去打咗個轉。

 「龍城」個建築外型似一條蜿蜒嘅巨龍，因而取名為「龍城」，2018年擴張後分為一期同二期，有兩層，兩期總面積270萬平方呎，有超過4000間店舖，加上32萬平方呎嘅倉庫。正門對出嘅廣場放有一個大型嘅龍型雕塑。龍城除咗雜貨舖仲包括戲院、食肆，隔離仲有間酒店相連。行入龍城，沒有什麼特別嘅感覺，因為嚟之前完全無期待，知道呢喥係賣平嘢，裝潢亦唔係典型嘅杜拜商場那樣華麗堂皇，比較簡單。即使嚟嘅時候喺週末，人流也不見特別多，或者係因為疫情嘅關係。不過，與其話佢係中國城，我覺得叫佢做東南亞城更適合，華人面孔只有少數，睇舖同賣貨嘅大多喺係東南亞籍，仲有前來購物嘅中東和西方顧客。令我比較驚喜嘅係，貨品嘅種類真係包羅萬有，各式各樣。飾品、內衣褲當然輕易可以搵到，除此之外，上至發電機、汽車配件、五金用品，下至小家電、床上用品以及潛水配備你都可以喺喥搵到。如果你想喺杜拜開餐廳做生意，呢喥應該有齊曬開餐廳所需嘅硬件配備。室外嘅有餐台、餐椅同假樹，室內嘅有牆紙、杯碟同壁畫。如果你夠心機逐間行下揀下，我相信你係可以喺喥搵到足夠物資開間很instagramable嘅餐廳/cafe。

    講返我個塑膠儲物櫃，well，我唔係一個識尋寶嘅人，無咩耐性同眼光。我只係行咗入「龍城」一期，查實呢條“龍”呢，由頭到尾有成千二米長，分成7個區域，行成個鍾我都搵唔到我要個塑膠櫃。室內冷氣又微弱，所以好快我就放棄了，連二期都懶得行，最後空手而回。之前我啲鬼妹同事好鍾意嚟呢喥買嘢，貪呢喥啲嘢全部made in china，夠曬平。不過經過我嘅“巡查”，我發現貨品價錢相對杜拜其他地方係平d,例如一個呃得下人，靚靚哋cushion套最平你可以搵到大概港幣25-40蚊，相比起杜拜宜家傢俬都平一半。只係個人就覺得龍城啲嘢整體性價比未吸引到要我山長水遠入嚟買（除非要大量入貨拿批發價），有需要嘅，我應該都係去返宜家傢俬，因為冷氣夠涼，同埋佢個1蚊（AED)雪糕實在太吸引啦！

    總結：如果日後你有機會移居嚟杜拜，龍城無可否認係一個尋寶買平嘢嘅好地方，買下牆紙、窗簾同飾品去點綴下屋企。開餐廳做生意嘅，你都可以喺喥批發入貨低價買到餐廳嘅配套設備。旅行路過杜拜嘅話，當然係直接skip咗呢個地方啦。下次我慢慢再同你哋介紹下嚟杜拜有咩好玩好睇！