【杜拜生活】 我喺杜拜搵好多?

「聽講杜拜人工好高㗎wor!」以前好多三姑六婆聽到我喺杜拜做過嘢,都會毫不忌諱咁問我喺咪搵好多。坦白講,我就唔覺得自己搵好多啦。但係以一間commercial airline嚟講,應該都叫唔差。

「聽講杜拜人工好高㗎wor!」以前好多三姑六婆聽到我喺杜拜做過嘢,都會毫不忌諱咁問我喺咪搵好多。坦白講,我就唔覺得自己搵好多啦。但係以一間commercial airline嚟講,應該都叫唔差。 

(注意:以下提及嘅薪酬及福利均以pandemic 發生前嚟作準,而家福利已經無咁好了!)

我係大概5年前入職,當時底薪係8700港紙一個月,其後就睇你每個月飛幾多個鐘。每個鐘約港紙130蚊。 以前一般飛75-115個鐘不等,睇當月有無放年假。 約以平均每月95個鐘嚟計,加埋底薪,每個月bank in 大概有港紙21,000。Layover allowance 相比起其他airline會遜色少少,通常一個24小時嘅layover會有500-600港紙。除非好彩拿到筍機,例如瑞士日內瓦,過夜零用錢就會有千頭港紙以上。一般每個月都會有6-7班layover. 所以每個月我就當有3,000蚊。 加埋21,000的話,每個月收入會有HKD 24,000。 如果你進取少少,做埋機上免稅商品推銷員的話,可以額外拿到10% commission. 呢個收入有啲難量度,因為好睇你做咩機,乘客鐘唔鍾意買嘢。我個人最高紀錄有班機賣咗6K港紙嘅嘢,賺咗600蚊。(我唔算係好積極去賣嘢,通常忙到甩輪真係唔會想做多樣嘢。) 

      喺阿聯酋打工,政府規定要為外籍勞工提供宿舍或者係住宿津貼。宿舍呢方面,通常2-3人一間屋(senior 啲嘅可申請一人宿舍),每人有獨立房間,有啲宿舍每間房會有埋獨立廁所。 宿舍包括基本設備:如雪櫃、洗衣機、床及衣櫃。雪櫃同洗衣機就要同室友共用。  一般兩人宿舍都有800-1000呎咁上下,水電費公司全包。如果你唔想住宿舍,可申請住屋津貼,然後搬出去住(批准後,另有交通津貼每月1000左右港紙)。住屋津貼就大約每月9千6港紙(資歷高嘅亦都會多啲)。 

      如果你選擇住宿舍,咁每月人工就HKD24,000左右,住宿交通水電通通免費,薪金亦係免稅,100%袋落袋。申請出去住,就多一萬蚊。所以之前都會有好多crew會選擇租啲平嘅studio或者搵人share apartment。 扣除實際租金,每月可以多幾千蚊港紙落袋。甚至乎,識計數,一入職時就買個單位,拿住live out allowence幫自己供樓。不過而家已經無呢隻歌仔唱啦,聽聞好似要結咗婚先可以申請live out allowance,因為公司唔想俾咁多津貼出去,所以近年自己起埋宿舍(以前公司宿舍有部分都係租返嚟,唔係公司自己嘅物業)。

好啦! 除咗每月基本薪酬及住屋津貼,仲有咩福利呢? 我哋每年有4,200港紙嘅牙醫津貼。每月「入會」Face Card 同 Platinum Card (會費大概每月120港紙),就可享有以下福利: 每月有4次cooking class(名額先到先得),食材免費,煮完可拎走;公司每月會有一次戲院包場,名額同樣有限;出示會員卡仲可在很多食肆及酒吧享有折扣,最高達50% OFF);喺指定酒店免費享用其設施,包括泳池及健身室等;此外可免費使用指定健身中心嘅設施及健身課程。

啊!仲有,機票折扣當然有,以前親戚朋友都可以買到平機票。而家就只能係登記咗嘅親戚先買到。平機票只有經濟艙可揀,除非你係艙務長,先可以買商務艙機票。

就咁聽落,大家覺得如何? 歡迎留言話我知,今次我以自己份職業入手同大家分享,下集我會講下杜拜其他工種嘅薪酬。

Leave a comment