【杜拜生活】杜拜究竟有幾貴?!之 無車無朋友?

我只想透過個人經歷帶出一個事實,喺杜拜,無車牌,無車揸,就等於斷了雙腳。

    上個禮拜咪同大家講完杜拜有幾貴嘅,大家覺得呢?睇落應該都仲可以吧!但我尋日同朋友食完個Brunch,計一計,餐Brunch好貴啊……(荷包流血了)我哋依家一齊嚟研究下點解會咁!?

      

     嗱~ 杜拜食個飯唔係天價,搭個的士亦都唔係貴,但係當你好似我咁,無車牌,下下出街要的士代步的話,其實飲杯咖啡都可以係天價!尋日,我去咗Bluewaters人工島食Brunch,其實唔太遠,距離住所不過18分鐘車程,但係如果搭其他交通工具的話,就要搭車又搭船先去到,時間上要花多1個鐘頭(當中仲要涉及至少15分鐘戶外或室內嘅步行路程)。要幾經周折先去到嘅目的地,基本上我會選擇搭的士。尋日的士來回總共230蚊港紙,午餐大概每人240蚊港紙(原價320,用咗crew member 25%OFF discount),你睇睇,圍返咁樣半日就洗咗470蚊港紙。夜晚出街食飯飲埋杯cocktail當然更貴啦,的而且確,我哋可以選擇近啲嘅地點,但要知道,其實18分鐘車程嘅距離都係一件好合理嘅事。

    

    杜拜鐵路並不如香港那般發達,有三條主幹線(包括無人駕駛鐵路同輕鐵),睇圖你會覺得似乎有覆蓋主要景點,然而,有啲目的地並不是出地鐵站就可以直接到達。除此之外,巴士路線亦不是一個方便嘅代步工具,路線規劃更遠遠比不上香港,唔會行個三五步就見到巴士站,同時班次亦十分稀疏。可以揀,出門都係搭的士(或者叫Uber/Careem)。

  

      嚟旅行就無所謂啦,但係如果要搬過嚟住就真係要考定個車牌啦!之前仲有做小紅帽嘅時候我完全唔覺得無車牌係一個問題,因為返工放工有公司巴士接送,間唔時放假先出街食個飯,一個月啲的士錢使極有閒。而家過返“陸地生活”,出街食飯,返工放工(有工開的話)無㗎車真係好唔方便,的士錢絕對會佔去日常開支一個好大嘅比例!

 

     若你手持香港駕駛執照,喺杜拜拿個車牌原來都係十分容易的事情。不用重新上堂考試,只要做個視力測試,帶備相關文件就可以,執照轉換費用大概係港紙1800左右。除咗便於出行,杜拜養車比香港也要便宜多了。先莫講車價起碼平香港一半,車位亦唔使用幾百萬去買,油又平,出街食飯“cup”個印仔,分分鐘泊車又免費。就算係普通泊街都係大概4至8蚊港紙一個鐘(視乎zone而定),每逢禮拜五同節假日泊街免費。講到泊街,大熱天時架車泊戶外,我都幾肯定你可以喺㗎車頭喥煎熟隻荷包蛋。四五十度,泊㗎車喺戶外,莫講話荷包蛋,上車嗰刻真係覺得自己都熟埋。

    

    講到呢喥,我都想即刻考返個車牌。平時揸開Mario Kart,有一定駕駛經驗,報堂學車可否打返個八折?!

最後回應下個題目,杜拜無車真係可能會無朋友㗎。 之前做crew嘅時候,如果同啲特別好傾嘅同事飛完,大家都會交換下IG或者聯絡電話。事實上,如果大家都無揸車,宿舍距離又遠嘅話,基本上再約嘅機率係等於零。想當年,我嚟杜拜住嘅第一個宿舍,方圓幾里得間Carrefour,去Downtown都要成40分鐘的士,我頭半年嘅生活真係dry到不能。到最後好好彩咁搬咗去「省城」,生活先叫做有返啲色彩。 如果大家都無揸車,一個住東,一個住西都做到朋友/情侶嘅話,要記住,呢啲絕對係真朋友/真愛!

資料來源:https://dubaiofw.com/convert-uae-drivers-license/

杜拜油價係每月定價
巴士班次很疏落
這個午餐大約每人HKD240
📍The London project

Leave a comment