【杜拜生活】杜拜究竟有幾貴!!??

睇到呢喥,你哋又覺得杜拜消費貴唔貴呢?出街食飯歎個TEA,的確唔平,但絕對有方法使得精明。

    好多人聽到“杜拜”都會覺得呢個酋長國/城市好有錢,平時出街食個飯都一定係天價。呢個假設啱一半啦!平就唔敢講啦,但貴就一定比唔上瑞士。究竟出街食個飯要幾錢呢? 我用幾個例子等大家心裏有個譜!

     以麥當勞Big Mac中汽水套餐嚟講,盛惠26.5AED,折合港紙56蚊。比香港貴大概15蚊HKD。有時候出去食餐鼎泰豐,兩個人埋單大概420蚊港紙,一籠6隻嘅海鮮小籠包大概80蚊港紙,一碟雞蛋蒜香炒飯約70港紙。想扮靚靚,食個有個氣氛嘅西餐又幾錢?我用ZUMA呢間餐廳為例,因為香港同杜拜都有分店。ZUMA香港主菜嘅價錢介乎港幣85至550蚊,而杜拜則是港幣130至720蚊,酒精類飲品同香港分店差不多。若計埋杜拜5%增值稅,服務稅(每間餐廳都唔同,有啲唔收,有啲就收大概5-10%),而香港通常就只收服務費。食落一餐飯,杜拜Fine Dinning比香港要高出大約30-40%。貼地啲,講下我最愛嘅平民餐,例如係譚仔的話,平平地又好食嘅,Sorry!係無㗎!!有啲商場Food court偽Chinese 炒麵/飯40蚊港紙有份,但係味道就同香港嘅爭好遠。呢個係我嚟杜拜後,最傷心嘅點。想出街平平地幾十蚊港紙食一餐,好味道,對得住價錢嘅亞洲菜式真係好難搵。驚中伏,食沙律、意粉同漢堡就安全得多。

    當然,大家睇得我啲文,我自然會教大家點樣慳錢,或者將啲錢使得有價值。杜拜其實有好多飲食app,除咗可以用嚟叫外賣,有啲app仲提供好多優惠折扣,好似我有個app叫Zomato,年費300蚊港紙,之前佢有Free one main course嘅優惠,出街食個西餐,兩人Free一份價值三四百蚊港紙嘅主菜,條數爭好遠!!有好多合作餐廳同酒吧仲會有2 FOR 1嘅酒精飲品優惠。而家肺炎肆虐,改咗全單15-40% OFF,依然不差。如果大家有機會嚟杜拜,記得Download呢個app,就算唔俾年費,都瞭解下邊間餐廳邊日有啲咩優惠,慳得幾多得幾多啊!! 

    平時出街食飯或者喺屋企叫外賣我會睇下個app喥有無餐廳做緊promotion。再唔係,自己煮就當然最慳錢啦! 其實喺杜拜好方便,大家都習慣online shopping,上至家居清潔用品,下至蔬果雞牛魚,都可以一app搞掂。雜貨用Amazon、蔬果有Kibson、海鮮類有FishBox、平時口痕買個雪糕用Insta Shop(病咗要買藥食用佢都得!),中國或者台灣雜貨有溫州超市。自己煮個番茄炒蛋10蚊港紙有找,一份菜心500克港紙9蚊。當然,親自去超級市場買可能會貴啲,但有得親自揀靚菜。

    睇到呢喥,你哋又覺得杜拜消費貴唔貴呢?出街食飯歎個TEA,的確唔平,但絕對有方法使得精明。另外有啲嘢真係平到你唔信!!!

例如:

1.請個鐘點工嚟屋企清潔下,都只係港幣60蚊一個鐘!!價錢參考:JUST MOP app

2.一個私人健身教練,港紙400、500蚊一個鐘就搵到!!!收你咁平之餘,有啲仲可以嚟埋你屋企個gym喥教你! 

3.脫毛真係好鬼平!! 脱個underarm一次都只係收你260港紙!呢個價錢,你香港搵到,都可能永世book唔到!去到仲要俾人追債式推銷買package。呢喥真係唔會咁,你買一次,買三次態度都係一樣,They really don’t care!價錢參考:Seagull medical center。(同事間推介,好多人都去過。自己去過兩次,環境真的不能期望太多,裝潢簡陋,但效果又真係唔錯!  )有興趣可以搵下佢哋個IG,或者自己搵另一間。呢邊嘅價錢大概都係咁,總之比香港平好多啦!

4.車!!香港車貴就眾所週知!杜拜啲車真係平,買車時,只係需要比5%增值稅,此外新車手續費大約1500港紙。同一型號嘅車,可以平過香港一半。

Dubai Mall 內嘅超市 Waitross,普遍價錢較其他超市貴。平價少少嘅大型超市仲有Carrefour

同一型號嘅車,平香港一半

杜拜生活必下載

Leave a comment