【杜拜生活】我有無俾人歧視?

當初搬嚟中東生活之前,我都擔心自己會唔會適應唔到當地嘅生活。英文唔係母語,人哋會唔會嫌棄我英文唔好;會唔會因為我嘅膚色而不平等地對待我...

「移民」可算是香港近期熾熱嘅話題之一,移民前要做嘅功夫不少:資金調動、選擇移居地、賣樓買樓,搵工搵學校,煩完一輪之後,仲要擔心去到會唔會俾人種族歧視,自己可唔可以融入當地生活?聽落都覺得怕。

 

當初搬嚟中東生活之前,我都擔心自己會唔會適應唔到當地嘅生活。英文唔係母語,人哋會唔會嫌棄我英文唔好;會唔會因為我嘅膚色而不平等地對待我……

 

喺開始討論之前,我想表達一下我個人嘅觀點。絕大多數情況下,如果有個陌生嘅外國人,無緣無故對我態度好差,我係唔會/唔願意首先諗到「膚色/種族歧視」呢一個原因。我會先觀察佢係咪對其他人都係咁,我會首先去假設「He/She is having a bad day.」又或者佢一個性格唔好嘅人。 我會嘗試主動釋出善意睇下對方有咩反應。因為我覺得下下認為人哋歧視自己,某種程度上,都代表自己嘅自尊心很脆弱(姐係玻璃心),甚至乎自己平時亦有歧視他人嘅行為。

 

返回正題,過去咁多年,我有無被歧視過?答案當然係「有」,不過都係喺工作上,航機上。但係以四年幾嘅飛行生涯,工作過嘅有過千同事,服務嘅乘客數以萬計,我記得嘅只有三次被歧視嘅經歷。實在係非常低嘅比例,很個別嘅例子。有機會再開文當八卦講下。

 

反觀我喺杜拜本土發生嘅被歧視事件,係「零」。我個人真係無被歧視嘅經歷。但並唔代表杜拜係無歧視的。杜拜有歧視問題,而且好嚴重。我有個印度籍朋友,自小已喺杜拜生活,係一個工程師,基本上過去多年都係拿住不符佢經驗同學歷嘅人工,原因好簡單,因為佢嘅國籍。而呢個例子只係其中一個。我聽過,好多工作,性質範疇一樣,換本護照薪酬已有大不同。曾經同一個亞洲面孔阿二傾計。佢話佢有次去唔知咩政府辦事處處理公司事務,一入去,就已經被叫坐低等一等。等咗好幾個鐘,終於到佢,點知佢拿出本楓葉國護照,個工作人員就話!「啊~早講唔使等咁耐嘛~ 我哋係朋友啊!」聽完都真係得啖笑。

 

我作為中間夾層 —— 無別人眼中的黃金護照,亦唔係拿住被歧視嘅東南亞護照,生活上都算順利。畢竟杜拜9成外國人,對不同文化背景嘅人算係好包容。我啲朋友都係嚟自唔同國家,英文好唔好,有幾好,溝通到就得。 重點,本地人英文都唔係好啊!! 再者,我覺得無論去到邊個國家居住都好,首先自己要打開懷抱,放寬心。嘗試去參加唔同嘅活動,識下朋友。無論對方係咩國籍同背景,傾得埋就做個朋友,傾唔埋就Bye Bye。真係覺得被歧視了,亦不必太在意。因為我常覺得會歧視人家性別膚色種族嘅人根本不值得同佢交流/做朋友。

 

最後,致想走的和不想走,但要走的你,無論你將來決定去邊喥住,我都希望你工作同生活順利,我明白重新開始一段生活、適應一個陌生嘅環境唔係一件容易嘅事。我同大家一樣都爲未來努力緊,我哋一齊加油啦! 

 

 

 

Leave a comment