【杜拜生活】娛樂戲院篇

杜拜嘅戲飛價錢平貴係可以相差好幾倍。以杜拜最大購物商場Dubai Mall嚟講,戲院REEL有26個影院,8個不同嘅主題。

    身處沙漠國度,平時假日有咩娛樂?有人鍾意去沙灘派對;有人鍾意悠閒嘅下午茶時光;有人鍾意健身操fit自己…… 坦白講,我喺杜拜唔算係社交生活多姿多彩嘅人。平時放假喺屋企做下豬,又或者見下朋友食個飯。撞正有心水電影上映,就會去睇場戲。最近講食嘅比較多,今次就講下杜拜戲院。

     杜拜嘅戲飛價錢平貴係可以相差好幾倍。以杜拜最大購物商場Dubai Mall嚟講,戲院REEL有26個影院,8個不同嘅主題。主要有小朋友專屬嘅影院;有4D感官體驗影院;有主打豪華享受嘅Ok platinum影院,當然仲有標準影院。標準座位嘅戲飛價錢就同香港差唔多,2D大概係港紙76蚊一張戲飛。 豪華Platinum影院就貴好多,一張飛大概359蚊港紙(餐飲另計)。

    

    記得之前第一次體驗豪華戲院,感覺的確幾正。一踏入貴賓廳,我就好似個大鄉里咁“哇”咗出嚟。成個lounge好有格調,華麗得嚟不覺俗套,唔係典型嘅阿拉伯風情,又金又閃。

   

    豪華影院共設有32個座位,每兩個座位相連,每對座位之間均有屏風阻擋,私隱度高。佢哋嘅真皮座位十分寬闊,好似按摩椅咁舒服,有三個按鈕俾你調節座椅。校啱適合自己嘅角度,瞓又得,坐又得,隻腳點擺都得。既有屋企梳發嘅舒適,又有戲院嘅清晰大螢幕,一個字“爽”!

    

     餐飲方面可以喺戲院門口購買食物,除左一般嘅汽水爆谷,仲有漢堡包,Pizza hut,Starbucks,雪糕任君選擇(不過帶得入場嘅應該同香港差唔多,雪糕免近)。有時男朋友想嘆下,睇platinum,順道食埋嘢。兩個人叫個中爆谷,一杯中汽水,兩杯沙冰,熱狗薯條餐,漢堡薯條餐,再嚟個薯角(其實叫得有d多,無薯角就啱好)。食物選擇唔算好多,質素叫合符資格啦,始終薯條漢堡呢家嘢衰唔得去邊。價錢我就覺得同香港戲院一樣,係一樣嘅貴啊!呢餐盛惠港紙490蚊,加埋platinum戲飛,兩個人,一場戲洗成千二蚊港紙。豪華體驗呢樣嘢,真係一次半次就好啦!

  

     之前試過去戶外戲院,螢幕背後就係哈利發塔,有豆豆梳發同私家大帳篷圓型床墊。價錢就300至400蚊港紙左右一張飛,視乎座位種類及是否節日場次,價錢包汽水爆谷。上次揀咗床墊,查實我覺得唔舒服,始終要就住螢幕角度嚟瞓/坐住睇,要成日換姿勢,不然會手腳麻痺。再者,戶外投影器光始終會散,畫面不夠室內戲院清晰銳利,少咗室內戲院嘅視聽震撼感。唯一比較新奇嘅係,戶外戲院9成9都係穿袍子嘅阿拉伯人,感覺好似去咗佢哋嘅私家花園聚會咁。

     最後提一提電影種類,八成放映中嘅戲都係熱門嘅西方片,字幕係阿拉伯文同法文。印度同其他中東地區嘅電影就大概佔兩成。有恐怖片,但就一定無鹹片,一般電影嘅鹹濕情節,例如以前嘅Fifty Shades of Grey就一定有刪剪。

   

    總括嚟講,中東戲院體驗並無什麼可批評嘅地方。座位新淨舒適,無臭味,過關!

座位非常舒適、寬敞!
疫情期間,每場次只會開放一半座位,保持社交距離。
Platinum 戲院是另外一層,入口設計得像酒店lobby,很有格調


Leave a comment