【杜拜生活】先生小姐,這裡禁止恩愛!

如果你喺大街上旁若無人、又錫又攬,那必定會遭人白眼,如果有警察前來,發現你哋原來係未結婚嘅,哈!那就更是罪加一等!

     杜拜相對於其他中東國家嚟講係十分開放的。 可以食豬肉、可以飲酒、可以party…… 不過有樣嘢,都應該提一提大家,嚟到杜拜千祈唔好做啊! 就係 “Public display of affection”。 姐係唔好喺條街喥咁恩愛啊!!哈哈哈!!

 

     實際上,UAE有條law,Couple係唔可以喺大街上拖手、親熱(Yes,即使係已婚伴侶),法律上指明,伴侶應該在公眾場合行為檢點。當然,律例已趕不上時代嘅變化,喺杜拜拖手真不是什麼大不了的事情(這裏不是沙地阿拉伯),所以無論喺已婚定未婚嘅伴侶公眾場合拖手都無人會管你。只係,如果你喺大街上旁若無人、又錫又攬,那必定會遭人白眼,如果有警察前來,發現你哋原來係未結婚嘅,哈!那就更是罪加一等!要附上法律責任的。咁情侶們想嚟杜拜點算好啊?唔好太擔心,只要按耐下雙方嘅情慾,唔好喺條街上巴黎鐵塔咁反轉又反轉地法式濕吻,輕輕拖個小手,短暫親個臉頰(不是嘴啊!),是完全沒有問題的,就當是回味下初戀的悸動吧!

 

     另外,未婚男女同居亦是不可以的。做Crew住公司宿舍嘅,每逢有親戚朋友嚟宿舍小住,都需要事先填寫一份訪客表,除訪客基本資料外,亦需要說明與訪客嘅關係。所以,通常男/女朋友仔嚟暫住,啲crew係會寫“Cousin”,因為只能係親戚關係嘅未婚男女先可以一齊住。事實上,公司點去check你哋究竟係咪cousin呢~ 都係果句,無事無幹唔會有人話你,公司亦都唔會一嚟就問你拿份文件嚟睇睇,要你證明你哋係老表關係,但萬一有啲咩事,我相信你死都會死份“文件”出嚟證明佢真係你表哥/弟/姊/妹。因為咁,漸漸地,“Cousin”成為了crew之間嘅暗語,即男/女朋友或情人。有時候crew之間傾計,講起落機之後去見cousin,大家都會多口問一句“Your real cousin?” 外加一個竊笑嘅眼神。

 

    咁唔係做crew但一齊同住又如何?記得之前有對英國couple朋友,一齊住咗成年都唔敢話俾人知,去到最後先知道,原來身邊嘅人早已見怪不怪。法律的確列明未婚男女不能同居,然而,住喺杜拜嘅都知道呢個情況根本就超級普遍,就算你上網check下杜拜旅遊前須知,十居其九都會話你知,法律上不能,但一般情況下,你唔好做啲令鄰居反感/騷擾到鄰居嘅事情,俾人有機可乘,report你就可以了。大家知唔知道,連超級保守嘅沙地阿拉伯舊年都宣布,未婚男女遊客現在可以同住一間酒店房,在此之前,連遊客都要出示結婚證明才能在酒店共處一室。

 

     中東國家逐漸開放背後嘅原因不難猜,尤其係杜拜,石油產業唔係佢強項,要發展金融、地產和旅遊業,必須要踏出自己嘅舒適圈,與世界慢慢接軌,如果繼續固步自封,這樣不能,那樣不能,又怎麼能吸引別人來發展/旅行?當然,作為外來人的我們,要來別人國家居住或旅行,了解當地文化也是應該的,避免做一些令人反感的事情,這是對別人的一種尊重。這也是我寫文的其中一個目的,希望透過這個小窗口,讓大家了解下中東嘅異域文化。

 

    小八卦:偷偷話俾大家知,喺街頭上曬恩愛是萬萬不能,就連到夜店想同喜歡的人跳個貼身舞亦會被場內保安阻止,親吻就更是不用問啦!可以不要問我是怎樣知道嗎? 

 

Leave a comment