【杜拜生活】中東夜場體驗

始終呢個地方咁有錢,佢d夜場真係比香港大得多,豪華得多,香港呢方面真係比下去了

     上次講完酒,今次就順便講下杜拜嘅夜場。

     無錯,杜拜唔單止可以飲酒,夜生活仲好豐富添!同香港一樣,呢喥每逢禮拜二、四都係Ladies Night,好多酒吧同夜場喺12點前都會無限供應一般嘅酒精飲品。每個禮拜四和五都係party之夜(呢喥嘅週末係禮拜五六),播放嘅音樂都是時下流行嘅英文曲目,有啲夜場一個禮拜會有一兩日係阿拉伯音樂之夜。之前曾經唔小心亂入,坦白講,本人真的不太懂欣賞,企咗15分鐘都無就離場了。

     初嚟杜拜嘅第一年,我係比較常出去的,一個月一次咁啦。不是說我有多愛Party,只是想聽聽音樂,跳跳舞,打扮下自己。可是經過數次失望,我而家連呢份心機都懶了。原因有幾個:首先,杜拜嘅夜店唔似香港嘅蘭桂坊咁集中。有陣時,去到一間夜場,發覺音樂不對,想轉場,好彩嘅,行個十分鐘,唔係就要搭十零廿分鐘的士去另一間。姑莫論下一間音樂如何,通常經過這番折騰,心情全無,往往一句“不如返屋企早抖,下次再出啦!”就收場。其次,不知是否版權問題還是DJ實在廢,d歌通常放個幾十秒就轉,有時候聽到首飲歌,正在興奮頭上,跳得個一陣,突然轉歌,轉得好就話,轉得差又係掃興。最後個原因比較個人,杜拜夜場都是烏煙瘴氣的,對於我呢d唔食煙嘅人,我真係覺得好惡啃。 講咗咁多杜拜夜場嘅缺點,唔通真係差到咁?咁佢都有少少優點嘅!始終呢個地方咁有錢,佢d夜場真係比香港大得多,豪華得多,香港呢方面真係比下去了。其次呢,我覺得杜拜夜場呢喥好多嘢睇,例如係女女,哈哈哈哈哈······香港夜場無咩睇頭,呢邊真靚女多,假靚女都多。所謂“假”呢,就係d整容整得十分誇張,潤腸咁嘅嘴唇,同埋不合常理的胸臀,很具娛樂性。

最後仲有d零零散散有關夜場同飲酒嘅嘢,我在此就點列出嚟,等大家睇得舒服d:

1.虔誠的穆斯林是完全滴酒不沾的,但對於他人飲酒嘅行為可是相當寬容。但你若是醉酒鬧事的話,麻煩就大了!監禁同罰款是理所當然的。

2.你好少見到人著白袍子(Kandora)落club,就算中東爸爸落club,都會換返件便服。至於著Abaya(女裝長袍)嘅女士就絕對無可能見到。

3.聽聞中東最好玩嘅夜場係喺黎巴嫩,我未去過,但有機會都想見識下。

4.喺club喥走嚟搭訕嘅男人好多時候一嚟就提及自己拿咩護照,有咩(家族)生意等等······(我未被本地人搭過訕,聽聞佢哋亦唔會隨便咁做,夜店以外也不怎麼會,自尊心問題。)所以嗰啲炫耀嘅人係阿聯酋以外嘅其他國籍。

5.色情場所我未聽過,但我知道有d夜場出名好多女女“搵食”,姐係收錢同人做“生意”嘅女女,價格不詳。有朋友試過誤入夜場:話說佢初嚟報到,俾boss帶咗去飲一杯。去到發現女同男嘅比例係8:2,怪怪的,一問之下原來全部都係“搵食女女”。朋友最後搭車返屋企,仲要俾人死纏,一路殺價想跟佢返屋企,女女最後仲話“唔做生意無問題,你俾我搭程順風車啦”。嚇到朋友最後跳上另一架的士逃走。

6.夜場基本上除咗齋戒月,大部分時間都會營業,有啲戶外舞池喺在夏季就可能暫停營業。現時疫情就當然全部無開啦。

7.雖則是中東,但夜場隨處可見穿著性感嘅女女。喺一啲二三線商場/地鐵站/政府部門穿得清涼仍有機會遭人指點。可是在沙灘、餐廳、夜場、就真是沒什麼人會在意。我曾經見過鬼妹同事個ig,佢個frd係白T凸點咁去party。呢點連我都震驚,真係唔知凸點原來都得。

大型半露天夜場WHITE

Leave a comment